Bagumbayan (Poblacion)

Ang Barangay Bagumbayan ay naitatag noong 1946, kasabay ng pagkakahiwalay ng Bayan ng Roxas mula sa Bayan ng Mansalay. Noong una, ang lugar na ito ay tinatawag na Poblacion dahil dito matatagpuan ang sentrong bayan noong nasa Paclasan pa ito. Nang tuluyang humiwalay ang Roxas sa Mansalay, inilipat ang sentrong bayan sa Poblacion, na kalaunan ay tinawag na Barangay Bagumbayan. Dito nagsimulang mabuo ang pagkakakilanlan ng barangay bilang sentro ng bayan. Ang mga unang nanirahan sa Barangay Bagumbayan ay ang mga pamilyang Fabella, Cabrera, Villaresis, Garfin, at iba pa. Isa sa mga mahahalagang bahagi ng kasaysayan ng barangay ay ang pagkakatatag ng Fabella College, ang kauna-unahang paaralan sa lugar. Ito ay itinayo sa tulong ng pamilyang Fabella, na sila ring nagsilbing mga unang guro. Ang mga naunang pamilya sa barangay ay nagmula sa iba’t ibang lugar tulad ng Romblon, Batangas, Marinduque, at Panay. Ang kauna-unahang Teniente del Barrio ng Barangay Bagumbayan ay si Silverio Fajutagana, na nanungkulan mula 1938 hanggang 1964.